GAGANA SAMOA

O le itulau lenei e faasoa atu ai ni mafaufauga ma tusitusiga i le Gagana Samoa.  Fa'afeso'ota'i mai i la'u imeli - aionomanu@gmail.com - pe a faapea e iai se mataupu e te finagalo ou te faasoa atu ai nisi manatu i le Gagana Samoa.

O le tusitusiga muamua lenei, o lo'u lauga sa faatinoina mo le sauniga lotu o le Au Leoleo, Aso To'ona'i 13 Oketopa, o le toe aso a o lo'o sauniuni atu le fanau e tapua'i i le Atua e ala i le Lotu a Tamaiti i le Aso Sa 14 Oketopa.  Sa ou avea ma ta'ita'i o lenei sauniga auā le faataunu'uina o o'u tiute fa'aletiakono.

LAUGA

O le lauga ile suafa ole Atua le Tamā, le Alo ma le Agaga Paia AMENE.  O le manatu autu mo lenei aso: “E faamanuia le Atua i fanau – E faamanuia le Atua i fanau.”

E maua mai se manatu mo lenei sauniga mai le tusi faitau mo le au leoleo, mai le tusi sa tatou faitauina – o le tusi o le Salamo 127.  Ma o le fuaiupu lona tolu mai lenei tusi, ou te fia faamamafaina, o lea sa avea ma uluai upu a lo tatou sauniga i lenei taeao, e faapea – “”Faauta, o le fanau, o le tofi lea mai ile Alii; o ē ua fanau mai, o le taui lea mai ia te ia” - Children are a heritage from the Lord, offspring a reward from Him”.

E tele tala mai le tusi o le Feagaiga Tuai o lo’o faamau ai  - o fanau e faamanuia e le Atua.  O le perofeta ia Mose, sa avea ma uso o Farao ina ua faataunuuina le faasalaga e fasioti uma ulumatua o aiga Isaraelu ina ua maua le valoaga o le avea se tagata Isaraelu ma tupu.  Sa talia le tofi valaau a le Atua na te taitaiina ma faasaoloto tagata Isaraelu mai le latou olaga pologa mai Aikupito.  O le tama o Samuelu, na fanau manuia mai ona o le ola anapogi o lona tinā ia Hana, ma na avea ma taulaga ile Atua, sa faaeaina ile tofi o perofeta, e o’o lava ina avea lona auauna faamaoni na filifilia ai Tavita e avea ma tupu o Isaraelu.  O Iosefa, le faamatala miti na faatau i Aikupito e ona uso loto leaga, ae sa avea ma se taitai sili o Farao, na laveaiina ai lona aiga mai le oge, ma na toe feiloai fiafia ai ma lona tamā o Iakopo ma lona uso la’ititi o Peniamina. 

O tala uma nei mai le tusi paia sa avea ma ta’iala mo matou le tupulaga i le ola tuputupu a’e i totonu o le Aoga Aso Sa po o le Aoga o le Faifeau i totonu o lenei Ekalesia.  Sa matou faalogologo i lenei tala, tauloto uma tala  ma vavega sa ola ai nei tagata mai le Tusi Paia, ina ia maua e matou le fanau ni a’oa’oga lelei, e fai ma faasinomaga mo le matou olaga faaleagaga. 

A tatou vaai loloto fo’i i tusi o le Feagaiga Fou, e atili lava ona manino i lea vaega o le Tusi Paia, le fa’atāuaina o tamaiti, ma le faamanuia o le Atua i fanau.  Aisea?  Auā o le Feagaiga Tuai sa folafolaina mai i valoaga a le au perofeta, le fanau mai o le Mesia, le ulua’i fanau, po o le atalii o le tagata, o le ā avea ma faaola o le lalolagi.  E uiga la, o le Feagaiga Fou, o le vaega lea o le Tusi Paia e faasino faapitoa i a’oa’oga mai le olaga a Iesu Keriso, ina ua liutino tagata o Ia, ma savavali ma soifua mai  ma tagata o le lalolagi.  Sa avea le alo o le Atua ma taitai o le au aposetolo po o le au so’o, ma na saunia faapitoa ai lona tofi taua, o le togiolaina o agasala o tatou uma, i lona maliu fa’alava’au tigā i luga ole satauro. 

A tatou vaavaai ile ola talavou o Iesu, e iai lava ni ata lelei e maua mo matou le fanau. 

Le taimi sa fanau lava o ia i Peteleema, i le ala maualalo o le fale o manu.  O le lesona taua mo le fanau – ia e agamalū, loto maualalo, ma ‘aua le manatu māmā i mea o lo’o alala i ai tagata eseese. 

Le taimi sa malaga Maria ma Iosefa ile taulaga ae na leiloa po o ifea na iai Iesu.  Ae maua ane, o lo’o talanoa ma faasoa ma faiaoga o le Tusi Paia i totonu o le sunako.  “Sa ou iai ile fale o lo’u Tamā”.  O le lesona taua mo le fanau – a iai ni faafitauli e feagai ma oe i lou olaga, mapu ane ile falesa, alu ile malumalu e maua ai se filemu ma mafuta ile fale e te tatalo ai, ma ia maua ai sou fesoasoani. 

Le taimi sa vavaoina e le ‘au so’o e tamaiti sa fia mafuta ma Iesu, ae na fetalai ane Iesu, e ‘aua le vavao o tamaiti – o lo’o faamau ile tusi a Mataio mataupu 19, fuaiupu 14: “ A ua fetalai atu Iesu, Inā tuu mai ia o tama iti e o mai ia te a’u, ‘aua le vaoia i latou; auā e faapei o i latou nei o e o i le malo o le lagi.” 

O taeao e faataunu’uina ai le Lotu a Tamaiti mo lenei tausaga.  A tatou mafaufau loloto ile faatinoga o tamaiti latou tauloto, pesepesega ma tala mai le Tusi Paia – e mafaufau ea tagata matutua, po o matua foi, ile fetalaiga lava lenei a Iesu?

“Auā e faapei o i latou nei o e o i le malo o le lagi”.  E tele taimi e faatonu tamaiti, ma e taofiofi latou fiafia ina ia ‘aua ne’i pisa lava latou.  E iloagofie le mū o le loto o se tamaitiiti mo Iesu, pe afai e leotele le faiga o lana tauloto, pe a leo mālie mai lona pese i pesepesega, pe a faatino lava le tulafono lona fitu o le ava i lona tamā ma lona tinā e faalevaleva ai ona aso. 

A tatou vaoia tamaiti e o iā Iesu, o le ā tonu lava le tatou galuega o matua ma tagata lotu?  I le taimi sa papatisoina nei tamaiti, e pei e galo ia tatou tagata lotu le tautinoga sa tatou tauaveina, o le vaaiga o fanau ma le tausia i latou i totonu o le tatou Ekalesia.  O se lu’i mo le tatou nu’u – ia avea ni avanoa e mafai ai ona fesoasoani ai tatou – e faamanuia e le Atua tatou fanau. O fanau uma i totonu o le tatou Ekalesia, o oloa tāua lava mai le Atua.  “Faauta, o le fanau o le tofi lea mai e le Alii, o ē ua fanau mai, o le taui lea mai ia te ia.“ AMENE.