Po o a fea ea e toe sau ai - When are you going to return
Afio mai mo a'u nei - Come for me here
Ta fia vaai atu - I want to see you
A ou mafaufau i le toe afio mai o le Mesia, ou te lē iloa pe ou te ola pea. Aisea e faapenā so'u manatu? E lē lava so'u faatuatua ile Atua? Leai. Pau lava, o le tele o tagata, o lo'o iai ni manatu 'ese'ese ma talitonuga e faailoa mai ai, le fe'ese'esea'iga ma le (tai foliga ea), o se tama'i vevesi pe a talanoaina lenei mataupu. Ae ou te lē mautinoa pe ou te ola pea i lenei lalolagi; pe ou te oti muamua ona fa'atoā toe afio mai le Alii. Atonu o se mea e lē tatau ona popole fua tagata i ai. Ae e leai se mea o iai, pe a saga sauni pea ma fa'atali po o le ā le valaau e o'o mai ia te oe.
E o'o mai lo'u oti - My death will come
E lē mafai na galo - I will not forget
Le mafutaga lilo - The hidden relationship
Ma oe i so'o se aso - With you on any day
E te mafuta ma lou Atua i so'o se aso? O lou lava mafutaga ma le Tamā o i le lagi, e lē o se mea e so'ona silafia e seisi. E amata ma gata ia te oe ma lou talanoa, faasoa ma faatuatua i le Atua. E leai se mea e te popole lava i ai. O le mafutaga lilo o se mea e lē tau faailoa i nisi, e lē tau soona fa'aalia i le lalolagi. Ae a oe? E te fiafia e feiloai ma lou Alii? Ua e sauni e talia so'o se fa'afitauli o le ā uia mai? O ā nisi mafutaga lilo e le o silafia e nisi o lo'o e tauaveina? Seia iloa pe a o'o mai le oti.
Iesu e lo'u Fa'aola - Jesus my Savious
Afio maia oe - You are welcome
Se a ea lenei lalolagi - What of this earth
Ae ua leai se faamoemoe - As there is no hope
Ailoga e iai se faamoemoe i lenei lalolagi. E tele ina sesē mea e naunau ai tagata. E tu'u lava le latou faamamafaina o mea totino, o mea o le olaga nei, o mea e lē mautū. E te tagi ea i lou Fa'aola e lavea'i mai ia te oe? E te taliagofie tagata e lē tatau ona taliaina, ae galo ia oe le taua o Iesu i lou olaga. A e lē paleni lou olaga ona o lou naunau i tafaoga, ma le fa'aputuputuga o le mauoa, ia e faitau lelei i le tala o le tamaloa mauoa, sa musu ona foa'i ma fa'asoa ana mea taugatā i tagata ese. Sa manatu lava o ia, sa lava lona tausisi ma le usitai i tulafono, ae galo ia te ia le ola fesoasoani. Sa sili lava ia te ia le olaga fa'aletino, ae e lē loloto pe moni lona fia auauna ia Iesu. 'Aua e te mana'o i le mea a lē lua te tuaoi - auā ailoga o se mea lelei e maua ai sou manuia po o sou nofoaga ile lagi.
A ou vaai, vaai atu - When I see, I see that
Le goto a le la - The sun has set
Manatu ile ola nei - I think about about this life
Se mea a faigata - As such it is hard
O ā ni ou mafaufauga pe a e maimoa ile goto o le la? E tepa ea ou manatu i taimi ua sola, i tagata ua lē toe mau i lenei lalolagi? Ou te lē iloa po o ā ni ou lagona pe a e silasila i le goto o le la. Pe e te manatua nisi foi afiafi sa e faasaga ma le la faapenā. Ou te talitonu, e faigofie lava ona manatu i le ola nei, o se mea faigata. Ae e lē faigofie ona maua ni mea e taua, mea e mana'omia lava e tagata, pe a e lē eli ma saili, ma ola punoua'i i ai. Taumafai e saili ni auala e fa'afaigofie lou olaga. E toatele lava o tatou e tauva ma nisi o tatou uso a tagata. Tu'u ia le loto ita e le isi i le isi, teu fo'i le loto leagai i lou ato pa'u, auā e leai lava se mea lelei e maua i le tau fa'aleaga o nisi sui, auā o tatou lava vaivaiga i le fia sili ma le fia tagata e fai ma ta'ita'iiga sesē.
E o'o mai la'u oti - My death will come
E lē mafai na galo - It will be hard to forget
Le matufaga lilo - The hidden relationship
Ma oe i so'o se aso - With you on any day
E iai ni ou mafutaga lilo? E a'oa'o mai le Tusi Paia ina ia tatou mafuta i le Atua e ala i talosaga, ma le faitauina o lana Afioga Paia ina ia fai ma ta'iala ma le faasino ala mo manuia o lo'o tatou sailia. Ou te mafaufau i le taimi sa ou la'ititi. O le olaga o se tagata Samoa, ia faamasani i le auai atu i fa'alavelave fa'aleaiga, fa'alenu'u ae maise o fa'alavelave i totonu o Ekalesia. E tautalagia ma felafoa'i solo le fa'aupuga lea o le "galogatā". I taimi o mafatiaga o aiga e ala i maliu, e te faalogo so'o i le fa'aupuga lea. E iai ni mea e galogatā mo oe? Ou te iloa o tagata e fai mai so'o e galogatā se mea, po o le galogatā o se tagata - e lē umi lava ae e galo mea sa fai mai ua galogatā. O se tala e tautala so'o i ai tagata i taimi o maliu i le faiga o molimau. O ā ni molimau e faia e tagata ola mo oe pe a mavae le ola nei?
Iesu e lo'u Fa'aola - Jesus my Saviour
Afio maia oe - You are welcome
Se a ea lenei lalolagi - What of this earth
Ae ua leai se faamoemoe - As there is no hope
O lo'o feagai lava aiga ma uo ma maliu i lenei taimi. O le isi uo, o le tamā o le aiga ua toesea. O le isi uo, o le uso matua ua sola. Toaga e mafuta ma aiga ma uo. E lē iloa lava le itula po o le taimi e sui atoa le olaga ona o le maliu ma le oti. O le pese lenei o se pese ou te fiafia e faalogologo i ai. Auā a mou ese atu lē ua pele ia te oe, na'o Iesu e maua mai ai le filemu e lē maua i lenei lalolagi. Ai o le manatu lea o fatupese mai lenei fa'aili, e faamanatu mai i le au fa'alogologo, ia tumau le finau i mea sili, ona o le finagalo lea o le Atua ina ia galue malosi mo Ia, ina ia tautua ma fa'amaoni i tiute ma tofi o lo'o fa'aavanoa mo oe. Auā a tatou galogofie le fia malaga i le lagi ina ia tatou fa'atasi ma ē o lo'o muamua atu, se a ea lenei lalolagi. . .