Alo i ou faiva ia manuia
'Aua e te loto vaivai pe a o'o mai faigata
Lua te faatasi ma le Atua
I so'o se ala e te uia
O le a ou faiva o le ā e alo atu i ai? E tofu lava tatou ma tofi ma tiute o lo'o feagai ai i totonu o aiga, fale faigaluega, Ekalesia ma nisi foi fa'alapotopotoga. E faigofie lava ona fa'aalia amio, pei o le musu ma le augatā, pe a o'o ina foliga e faigata auala o lo'o i o tatou luma. A faapea e tumau pea lagona vaivai ma le lē lava o lou fa'atuatua, ia e toaga ma mafuta ma le Atua. A tatou to'a'aga e mafuta ma le Atua e ala i talosaga, e fa'afofoga mai pea le Tamā i tatou manaoga. Ae ou te masalo o le itu sesē o lo'o manatu ai le to'atele o le tatou atunu'u - w mo'i e fa'afofoga le Atua i tatou talosaga, ae, e galo ia latou, o Lana finagalo paia e tatau ai ona tatou lagolago i ai. E iai nisi taimi e lē talia le Atua tatou talosaga e tusa ma tatou mana'oga, auā e le'i tutusa lo tatou galue ma le tatou talosaga atu. E tatau ona fa'apaleni lelei mea ia a e lua - 1) ou galuega 2) ma lou mafuta ma le Atua.
Lo'u atalii ia e faalogo mai, i la'u nei upu o le a fai
Ia e nofo sauni, 'aua ete solomuli i la'u faaiuga ua fai
O le lalolagi nei e tumu i mea masei
E tele faaosoosoga, e vaivai ai ou lagona
Ia e loto tele, 'aua e te fefe
Alu ma le fiafia, lo'u atalii ia manuia
A tatou tala'i ni galuega po o ni tonu o le ā fai, ia taumafai ia fa'ataunu'u. E tele mafuaaga e solomuli ai, mai nai faaiuga ua fai. O le lē faamaoni ma le lē tauivi ina ia tini le faamoemoe. A ua e solomuli, fesili lava oe i lou lava tagata - ua e fia la'ala'a atu pea i luma? O le vaitaimi nei i le lalolagi atoa, o lo'o tatou fa'afesāga'i ma le ma'i fa'apisi o le Korona. Ua maua fo'i le tala ua uma ona fai su'esu'ega mo le tasi sui sa fa'apea ua maua e ia lenei fa'ama'i, ae ua maua le i'uga o su'esu'ega, e leai se mea ua afāina. Ou te mafaufau i nai tuagane ma le uso sa malaga mai Samoa i Niu Sila i le tausaga ua mavae mo nisi polokalame o le fa'alelei atili ai o le puipuia o Samoa. Talosia o lo'o puipuia foi nei auauna mai le fa'apisi o lenei ma'i.
Lo'u afafine se'i e faalogo mai
I le ma upu o le a fai
Ne'i e manatu mama, loimata o lou Tina
A o e folau i le vasa loaloa (e faigata)
O oe e malu ai le aiga nei, lo'u afafine se'i alofa fai lelei
Ta'ai ese lau fala, tu'u ese le aluga
Fa'amalosi mai, se'ia o'o i le taunuuga
O le fuaiupu nei o le pese e momomo tele ai lo'u loto. E tala feagai lava lenei fuaiupu ma lo'u ola fa'atuputupu a'e i totonu o lo'u aiga. E malie lava, auā e ui lava ina tele lava faailoga ua maua mai o'u a'oa'oga, ae e foliga e lē aogā nei mea uma, pe ā lē o fa'atasi ma le ola tautua ma tausi lelei o'u matua. O le laina o le fuaiupu e maligi ai o'u lo'imata - o le laina lea - o oe e malu ai le aiga nei. Ana faapea o a'u o se tagata e loto vaivai ma le lē tino ū e tausia o'u matua - e ma'imau le taimi ua o'u ola ai. Pau lava le mea o lo'o iai i le agaga - ia aogā le anapogi o lo'u tinā ina mo lana fanau. Ma o lea, ua ou lagona, o lana fanau o le tali o le talosaga i le Atua. Ou te fa'atusa lo'u tinā ma le faletua o Hana i le Feagaiga Tuai o le Tusi Paia - o le mo'omo'o ina ia iai se tama e fai ma taulaga i le Atua e ala i le galuega o le faifeau, ma a'u nei, o se teine ia taumafai ia pei lava o ia.
O ou mama na, lo'u uso, alo i ai ou faiva
Ia uluulumatafolau lou faamoemoe aua le taua
Ia toa lou loto, ia manatua, o lo'o tui le mulipapaga
A nai matua,ma nai aiga, ae maise alalafaga
Nofo tatalo, tapua'i, ia faaloloa le ala
Aua lau savaliga ne'i tuia lou vae se ma'a
Lo'u uso fa'alogo lelei ile augagi a Ma ma Papa,
O fautuaga e fai mo oe, tua ai i manu lau faigamalaga
Ua leva ona ou tau fatu ni manatu e uiga i lea pese. O se pese fa'amalosi'au ou te tātā i taimi pe a ou lagona le vaivai ma le musuā. E aogā le pese e faamanatu mai o le malaga mamao o o'u matua mai Samoa ina ia maua se lumana'i o le fanau. Ae o le taimi lenei - ua salalau i nisi atunu'u o'u tuagane, ae na'o a'u o lo'o nofo ma o'u matua. Ou te lē fā'atu i le galuega lea o le tausi matua. Ua ou malamalama lelei i le galuega o le teine Samoa moni - o le tausiga o matua. Ou te faafetai i le Atua ona o lesona aogā e ala i fautuaga ma tima'iga ua tu'uina mai e o'u matua ia te a'u. Ou te iloa e tele lava le fili ma le tiapolo o lo'o taumafai mai lava e fa'asesē ai le ala, ae ou te iloa, o talosaga o o'u matua, ua ou manuia ai. O le pese atoa lenei, o lo'o fa'amau ai mo'omo'oga o matua mo fanau.
Faalogo lelei ma e manatua, alu ma amo nai ta matua
Aua te fefe, loto tele, O oe o le lupe o le a faalele
Tete'e le fili, tete'e le pia, tago e sapo le manuia
Toaga i le lotu, toaga tatalo, aua ne'i galo lau Tusi Paia
Oe se sole se 'aua te tagi, tepa taula'i le Atua o le lagi
Se faamalosi o oe le toa, tau le taua mo Samoa
Ia ua tele na fautuaga. teu lou loto ma lou agaga,
Ae sau ia ta faatofa, Ia tu Ieova i lo ta va
Ou te lē iloa po o le ā le finagalo a le Atua mo a'u, ma aso o lo'o totoe o lo'u olaga. Pau le mea ou te iloa, e tatau ona galue malosi se'ia o'o mai le valaau a lo'u Matai. Talu ona oti si o'u to'alua, o le manatu o o'u matua, e lē toe fai se fa'alua. Ou te fa'amoemoe pea i le Atua i lenā tulaga. Mo le taimi nei, ia fa'auma ma fa'amuta lelei fuafuaga ua uma ona amata. E lē mafai ona toe tepa i tua ma toe fo'i i le paiē, le fa'ali'i ma le augatā. O ā ni fuafuaga o lo'o e feagai ma oe i lenei vaitaimi? Loto tele uso ma tuagane. O oe lava e mafai ona fa'ataunu'u lou fa'amoemoe pe a ō fa'atasi lou galue malosi, talosaga a lou aiga atoa ae maise lou talitonu pea i le Atua. A o'o ina fiu ou matua i lou lē usita'i ma lou lē fia fa'alogo, e masani ona e fa'alogo i le fa'aupuga nei "Ua uma upu. Ou te lē iloa po o ā nisi upu e toe fai atu ia te oe." Teu pea fautuaga aogā a ou matua i lou fatu. Ia avea ma talitā e puipui ai oe, pe a o'o ina e tau se taua. A ua e fia malolo, malolo. Ae 'aua le tu'ua le galuega, se'i mae'a lelei, se'i a'ogā talosaga a ou matua. A e vave fa'amavae, e te lē o iloa - o lo'o latalata mai le manuia. Ia alofagia pea oe e le Atua, ia luga ia te oe Lona filemu. Tepa taula'i le Atua o le lagi, ma alo i ou faiva . . . .
'Aua e te loto vaivai pe a o'o mai faigata
Lua te faatasi ma le Atua
I so'o se ala e te uia
O le a ou faiva o le ā e alo atu i ai? E tofu lava tatou ma tofi ma tiute o lo'o feagai ai i totonu o aiga, fale faigaluega, Ekalesia ma nisi foi fa'alapotopotoga. E faigofie lava ona fa'aalia amio, pei o le musu ma le augatā, pe a o'o ina foliga e faigata auala o lo'o i o tatou luma. A faapea e tumau pea lagona vaivai ma le lē lava o lou fa'atuatua, ia e toaga ma mafuta ma le Atua. A tatou to'a'aga e mafuta ma le Atua e ala i talosaga, e fa'afofoga mai pea le Tamā i tatou manaoga. Ae ou te masalo o le itu sesē o lo'o manatu ai le to'atele o le tatou atunu'u - w mo'i e fa'afofoga le Atua i tatou talosaga, ae, e galo ia latou, o Lana finagalo paia e tatau ai ona tatou lagolago i ai. E iai nisi taimi e lē talia le Atua tatou talosaga e tusa ma tatou mana'oga, auā e le'i tutusa lo tatou galue ma le tatou talosaga atu. E tatau ona fa'apaleni lelei mea ia a e lua - 1) ou galuega 2) ma lou mafuta ma le Atua.
Lo'u atalii ia e faalogo mai, i la'u nei upu o le a fai
Ia e nofo sauni, 'aua ete solomuli i la'u faaiuga ua fai
O le lalolagi nei e tumu i mea masei
E tele faaosoosoga, e vaivai ai ou lagona
Ia e loto tele, 'aua e te fefe
Alu ma le fiafia, lo'u atalii ia manuia
A tatou tala'i ni galuega po o ni tonu o le ā fai, ia taumafai ia fa'ataunu'u. E tele mafuaaga e solomuli ai, mai nai faaiuga ua fai. O le lē faamaoni ma le lē tauivi ina ia tini le faamoemoe. A ua e solomuli, fesili lava oe i lou lava tagata - ua e fia la'ala'a atu pea i luma? O le vaitaimi nei i le lalolagi atoa, o lo'o tatou fa'afesāga'i ma le ma'i fa'apisi o le Korona. Ua maua fo'i le tala ua uma ona fai su'esu'ega mo le tasi sui sa fa'apea ua maua e ia lenei fa'ama'i, ae ua maua le i'uga o su'esu'ega, e leai se mea ua afāina. Ou te mafaufau i nai tuagane ma le uso sa malaga mai Samoa i Niu Sila i le tausaga ua mavae mo nisi polokalame o le fa'alelei atili ai o le puipuia o Samoa. Talosia o lo'o puipuia foi nei auauna mai le fa'apisi o lenei ma'i.
Lo'u afafine se'i e faalogo mai
I le ma upu o le a fai
Ne'i e manatu mama, loimata o lou Tina
A o e folau i le vasa loaloa (e faigata)
O oe e malu ai le aiga nei, lo'u afafine se'i alofa fai lelei
Ta'ai ese lau fala, tu'u ese le aluga
Fa'amalosi mai, se'ia o'o i le taunuuga
O le fuaiupu nei o le pese e momomo tele ai lo'u loto. E tala feagai lava lenei fuaiupu ma lo'u ola fa'atuputupu a'e i totonu o lo'u aiga. E malie lava, auā e ui lava ina tele lava faailoga ua maua mai o'u a'oa'oga, ae e foliga e lē aogā nei mea uma, pe ā lē o fa'atasi ma le ola tautua ma tausi lelei o'u matua. O le laina o le fuaiupu e maligi ai o'u lo'imata - o le laina lea - o oe e malu ai le aiga nei. Ana faapea o a'u o se tagata e loto vaivai ma le lē tino ū e tausia o'u matua - e ma'imau le taimi ua o'u ola ai. Pau lava le mea o lo'o iai i le agaga - ia aogā le anapogi o lo'u tinā ina mo lana fanau. Ma o lea, ua ou lagona, o lana fanau o le tali o le talosaga i le Atua. Ou te fa'atusa lo'u tinā ma le faletua o Hana i le Feagaiga Tuai o le Tusi Paia - o le mo'omo'o ina ia iai se tama e fai ma taulaga i le Atua e ala i le galuega o le faifeau, ma a'u nei, o se teine ia taumafai ia pei lava o ia.
O ou mama na, lo'u uso, alo i ai ou faiva
Ia uluulumatafolau lou faamoemoe aua le taua
Ia toa lou loto, ia manatua, o lo'o tui le mulipapaga
A nai matua,ma nai aiga, ae maise alalafaga
Nofo tatalo, tapua'i, ia faaloloa le ala
Aua lau savaliga ne'i tuia lou vae se ma'a
Lo'u uso fa'alogo lelei ile augagi a Ma ma Papa,
O fautuaga e fai mo oe, tua ai i manu lau faigamalaga
Ua leva ona ou tau fatu ni manatu e uiga i lea pese. O se pese fa'amalosi'au ou te tātā i taimi pe a ou lagona le vaivai ma le musuā. E aogā le pese e faamanatu mai o le malaga mamao o o'u matua mai Samoa ina ia maua se lumana'i o le fanau. Ae o le taimi lenei - ua salalau i nisi atunu'u o'u tuagane, ae na'o a'u o lo'o nofo ma o'u matua. Ou te lē fā'atu i le galuega lea o le tausi matua. Ua ou malamalama lelei i le galuega o le teine Samoa moni - o le tausiga o matua. Ou te faafetai i le Atua ona o lesona aogā e ala i fautuaga ma tima'iga ua tu'uina mai e o'u matua ia te a'u. Ou te iloa e tele lava le fili ma le tiapolo o lo'o taumafai mai lava e fa'asesē ai le ala, ae ou te iloa, o talosaga o o'u matua, ua ou manuia ai. O le pese atoa lenei, o lo'o fa'amau ai mo'omo'oga o matua mo fanau.
Faalogo lelei ma e manatua, alu ma amo nai ta matua
Aua te fefe, loto tele, O oe o le lupe o le a faalele
Tete'e le fili, tete'e le pia, tago e sapo le manuia
Toaga i le lotu, toaga tatalo, aua ne'i galo lau Tusi Paia
Oe se sole se 'aua te tagi, tepa taula'i le Atua o le lagi
Se faamalosi o oe le toa, tau le taua mo Samoa
Ia ua tele na fautuaga. teu lou loto ma lou agaga,
Ae sau ia ta faatofa, Ia tu Ieova i lo ta va
Ou te lē iloa po o le ā le finagalo a le Atua mo a'u, ma aso o lo'o totoe o lo'u olaga. Pau le mea ou te iloa, e tatau ona galue malosi se'ia o'o mai le valaau a lo'u Matai. Talu ona oti si o'u to'alua, o le manatu o o'u matua, e lē toe fai se fa'alua. Ou te fa'amoemoe pea i le Atua i lenā tulaga. Mo le taimi nei, ia fa'auma ma fa'amuta lelei fuafuaga ua uma ona amata. E lē mafai ona toe tepa i tua ma toe fo'i i le paiē, le fa'ali'i ma le augatā. O ā ni fuafuaga o lo'o e feagai ma oe i lenei vaitaimi? Loto tele uso ma tuagane. O oe lava e mafai ona fa'ataunu'u lou fa'amoemoe pe a ō fa'atasi lou galue malosi, talosaga a lou aiga atoa ae maise lou talitonu pea i le Atua. A o'o ina fiu ou matua i lou lē usita'i ma lou lē fia fa'alogo, e masani ona e fa'alogo i le fa'aupuga nei "Ua uma upu. Ou te lē iloa po o ā nisi upu e toe fai atu ia te oe." Teu pea fautuaga aogā a ou matua i lou fatu. Ia avea ma talitā e puipui ai oe, pe a o'o ina e tau se taua. A ua e fia malolo, malolo. Ae 'aua le tu'ua le galuega, se'i mae'a lelei, se'i a'ogā talosaga a ou matua. A e vave fa'amavae, e te lē o iloa - o lo'o latalata mai le manuia. Ia alofagia pea oe e le Atua, ia luga ia te oe Lona filemu. Tepa taula'i le Atua o le lagi, ma alo i ou faiva . . . .